BELAJAR TETANGGUHAN [TANGGUH HIMPUN JUNGKU

Diposting oleh Ronal Dzikrin, S.H.I. , , Sabtu, 07 Oktober 2017 11.57.00




HIMPUNAN PELESTARI ADAT RANAU (LAMBAN GEDUNG KOTABATU)

Guru : 1. Bpk. Muslimin (Pagar Dewa)
                (pembimbing Tetangguhan)
           2. Bpk. H. Tamsil Sukur gelar Batin Perwira
                (pembimbing Tetangguhan, & Susun tindeh adat)

CONTOH TANGGUH HIMPUN JUNGKU (SECARA UMUM)

Assalamu’alaikum,wr.wb.

Tangguh mit Suntan/Dalom
  • Jadi aga tetabik pai jama Suntan beliauan disan, ajo injuk manak muari jak bidang tumpuk mit bidang jungku ni, injuk adu teson timpok, kintu bang mawek ngedok sangkut berabat ni lagi, mungkin do dia injuk aga tibukak serta retiani adu wat izin jak suntan disan…..
Jawaban jak Suntan/dalom
  • Payu ana radin, adu nengis pai sekam dija retiani api ya juga wujud-maksud warah ni keti rumpok disan, kemeda ni jak isan, reno do injuk ani keti rumpok karu, adu mak ngedok sangkut berabat ni lagi, injuk manak muari jak bidang-bidang tumpuk mit bidang jungkuni adu teson timpok dija, jadi payu ana… mak ciga dia tibukak.
*************************************
Tetabik, Kilu mahap.

  • Batin Beliauan… aga tetabik pai jama Batin disan, laju kepak jama neram pok kunyin ni, jak unggak, jak doh, laju kepak jak lumpak ni, sekindua dija aga ngebabahko tangguh mewakili sekam semuarian ramik, laju kepak di ………………………… tian rua minggoman ji.

  • Semakung ni sekindua ngebabah ko tangguh daleh warah / paris. Sekindua dija aga lamon-lamon kilu mahap, kintu bang kintu nihan delom tangguh / paris sekindua, mak kena di susun tindeh ni, serta injuk kimbang sesuk sendalai gayani, atau pun injuk kimbang mucapu gayani, delom seno sekindua aga lamon-lamon kilu mahap. Gelar ni injuk bagi ni sekindua dija nyelom sambil nginom, jak belajar jawoh tangeh, pengluleh mawek muneh… mak kintu uleh ni manan…

Ngemukakon Terimakaseh

  • Batin……. Sai pertama delom tangguh sekindua, aga lamon-lamon terimakaseh jama neram pok kunyinni manak muari, Jak unggal-unggal tumpukni laju kepak jak bebidang jungku ni. Sai radu dacok nyemuka pada bingi sinji, ngabul ko kaulan sekam pada dibi jeno sa. Na mungkin muneh wat manak muari sai makung dacok nyemuka pada bingi sinji, injuk bagi neram pok sai wat dija aga jadi wakil mutlak jama tian pok manak muari sai makung dacok nyemuka. serta api juga kicik rencaka neram pada bingi sinji, aga ngilu pengatu muneh kesampaian jama manak muari sai makung dacok nyemuka.

Ngemukakon Kicik rencaka ni Tian rua jong.
Serta Semaya penyedekahan (hasil jak nyesui luyut)

  • Kemedani jak isan, jo dia, injuk bagini …………….. ji, lain hak injuk kimbang samar-samar, adu 2-3 minggu ji, jak ngejalin kicik rencaka jama …………. Jak lumpak no, api juga sai di rencaka ko tian rua jong ji dikala dinana, temu disai muhalok serta nyampai disai mupatut. Segala rencaka ni tian rua jong ji dikala dinana sa lain muneh kik hak taru dikicik rik lalang begurau ria, kintu niat ni aga ngecemecok kon rumah tangga. Daleh injuk tian rua jong ji radu dia buwarah jama sai ulun tuha putatawok, serta injuk bagini tian sai mutuha putatawok radu muneh jak putatemu, nyesui kici’an ni tian rua jong ji dikala dinana sa, temon-kudo mawek kudo ni, serta ngilu tunjuk tawai muneh aga ulang lajuni.

  • Na…. syukur Alhamdulillah… api juga kicik rencaka dikala dinana sa, injuk way nutuk buloran gayani. Ria kik injuk ulang laju delom rencaka an ni tian rua jong ji, serta semaya lamba ni, pangkut pernikahan ni, serta pangkut penyedekahanni, rani betik rani kunyaian ni, kena muneh di bilang pak ni.

  • Ya do da dikak tanggal …. Rani ……… (jam…..)pangkut pernikahanni, serta tanggal ….. rani……….. pangkut penyedekahanni, kena di bulan sinji. Temego do neram sa aga ngakan menyan sanga sumbu sedekah sanga cutik, pangkut panggung ni injuk bagini tian rua jong ji. Na mudah-mudahan muneh delom ngehadapi penyedekahan sinji kena dirani betik serta kunyai musuwok, musebu di nyawa rik rejeki.


Aga ngeharap Puson-son dija Serta Ngilu tulung Ngedenyakko guwai


  • Jadi Batin…….. seno do wujud maksud neram pok teson dija pada bingi sinji, delom seno muneh lain hak aga ngeni pandai ria begawoh, kintu aga ngeharap jama neram pok manak muari, tuha bai,tuha bakas, sanak daleh muli-meranai ni, aga ratong serta puson-son dija. Kintu bang mak kebincang jak jaoh-jaoh ari ni, dikak pupagian ni sa ngasido.

  •   Batin…… delom ngehadapi geguaian sinji muneh injuk bagi ni sekam semuarian laju kepak ……………………… tian rua minggoman, aga ngilu tulung daleh ngilu junjung, serta ngilu runjung. Na mak do da kik kiwak di sekam semuarian kik mak wat ditulung keti manak muari, baik di teduh pileh-iwak jingkau ni, laju kepak dirukun peranti-karang balang ni, pun juga di anok pelawa pengiri-penganan ni sai aga ti harap tipakai dikak dinana sa.


Na Batin….. skindua ngilu mahap pai, ajo aga tikerap ko pesan ria……….


Adat penakai Hiyor sumbai


  • Jadi batin…. Bukenaan jama adat penakai, api juga sai radu di cemecok ko tian sai mutuha tumbai, makung muneh da hak wat pecoh girai ni, neram sa maseh perda makai ia… na seno sa aga ti cemecok ko muneh, jak atas mit debah ni.

  • Riakik sai bukenaan jama hiyor sumbai, kintu bang neram radu selesai jak burencaka kanah serta neram radu seulang-ulang, na aga kewarahan muneh jama bai sanak kamno di lamban. Kintu bang tian ngebabukak buku, injuk kimbang wat titulis,  seno sa aga tiharap kon ya. Kintu bang mak ngedok, na mak salah ni nanjak, seno api salah ni tiharapko juga, na kintu bang makung kebincangan, lagi wat keperitukan di sasurangni, dang muneh hak aga jadi pukecing. Adu pai seturuk mawat nimbul, kok badan mak muneh, mok ga  kerugian ni.



Ajang Bahagian Guwai…..


  • Batin beliauan, kemedani jak seno muneh, delom ajang bahagain geguaian neram, adu wat muneh tetok tingon ni uleh ni jelma ngura kamno.

  • Ria kik dikak jemoh no sa, nerampok aga negak ko tarup di halunan no, na lain do ana hak aga nemak ko anok pelawa serta pengiri-penganan ni, kintu injuk ani bebai kamno indang kimbang muhalibuk aga teregah tecakak ni, serta aga rang-rang ni jelma ngura kamno bu lalundar, dipa muneh ruka tanno sa injuk kimbang penerai.
  • Dikak sawai ni sa, neram pok no aga bu kakureh, nyerelai kik di ulun, na injuk bebai kamno adu ngari ko siwok, kelapa daleh gula ni. Kada iya ni cukup guai ni bebai ria, kidang mak muneh mingan kik mak di tampori Neram ragah.

  • Seno muneh sai aga menjadi pengwarahan neram jama kelepah puari, ama kemaman, daleh lebu-kelaman ni injuk bagini sanak sinji. Nanda ko neram jak sedekah cutik pangkut ni sanak sinji.

  • Na dikak pujemohan ni sa, pangkut ni sesayak nikol, wat do da pepati’an sanak kamji ria kik injuk sapi lunik sai. Delom seno muneh neram aga bebarong nge gerdani ya, jak matah mit mesak ni. Seno do sai aga menjadi pemangkal ni gulai neram kak dinana ni sa.

Cawa ni bintang lunik : Radupai sanga pangkut, sang bahiti ni lagi…….


Pangkut Pernikahan

  • Na dikak (derani ni sa/jak jemahatan ni sa), pangkut ni tian rua jong ji aga ti nikah kon di anok pelawa ji, delom seno muneh aga bebarong pai neram ngehadiri ya, serta nyaksi kon ya daleh ngedu’a kon tian rua jong ji. Mudah-mudahan injuk bagi ni tian rua jong ji, delom netai kon berumah tangga, munyaian musebor, pelulung perda-lana, sekicik-serencaka, setutukan dicawa rik cara.

Pangkut neram ngakan menyan, Penyedekahan Tian rua jong(PANGAN)


  • Na dikak pupagian ni (minggu/sabtu) sa, temego do neram sa aga nyuah kon menyan sanga sumbu sedekah sanga cutik, pangkut penyedekahan ni tian rua jong ji, injuk tian rua jong ji aga ti bebalin bulung pakaian ni mit pakaian adat, daleh aga regah jak anok pelawa ni raja (dunggak/dedoh) no, ti (unggak/doh) ko ni sa, aga pakai alam gemiser serta aga ti iring kon jama hadra, na aga bebarong muneh do ram aga ngiring kon ya.

  • Sesampaini di halunan no, makung muneh do kik hak aga nubas, neram aga langsung mulang mit anok pelawa neram, kintu neram aga bu hahabu pai di tarup no, rang-rang ni sai mena bu hahabu, sai duri putatutul, serta kintu bang jelma ngura kamno aga bebasa melayuan na disan muneh sirang ni.

  • Kintu bang injuk bagini Raja beliauan no wat kahut abut ni aga ngerarua kon gelar, na mak muneh nyalahi jak adat.

  •   Kintu bang radu selesai segala tayub rik kedayok neram di tarup no, ampai do neram aga ngakan menyan sanga sumbu sa, aga ti harap pengatu pai neram mit anok pelawa ji, pangkut penyedekahan ni tian rua jong ji, serta delom seno muneh neram sa aga ngedu’a kon tamong-kajong, ina-bapak, manak muari sai adu mena “mulang”.

  • Kemeda nijak seno muneh neram peperda budu’a injuk bagi ni tian rua jong ji pelulung perda lana, serta sakinah, mawaddah,warahmah. Serta ngedok keturunan sai sholeh sholehah.

Penutup

  • Na jadi reno pai Batin…… sedah warah daleh tangguh / sedah paris, laju kepak cerita sanga bahiti rua ni jama neram kunyinni, kepak di batin….  Sai timpaan ni tangguh …




    Catatan:
  • MATERI diatas hanya sebagai contoh sesuai dengan susun tindehni Tetangguhan, untuk isi dan cara menyampaikannya tergantung dengan kelitahan di masing-masing individu.
  •  Penulisan kata huruf “KH” menjadi “R” agar memudahkan pembaca dalam memahami ma’na. contoh:  “Khiakik Khetiani” menjadi “riakik retiani”.
  •  Kata “Retiani” dipakai sebagai penyambung kalimat, dan sebagai jeda bagi kita untuk mempersiapkan kata/kalimat yang akan di ucapkan selanjutnya.

0 komentar

BELAJAR TETANGGUHAN [TANGGUH NYESUI LUYUT]

Diposting oleh Ronal Dzikrin, S.H.I. , , 11.32.00



HIMPUNAN PELESTARI ADAT RANAU (LAMBAN GEDUNG KOTABATU)

Guru : 1. Bpk. Muslimin (Pagar Dewa)
                (pembimbing Tetangguhan)
           2. Bpk. H. Tamsil Sukur gelar Batin Perwira
                (pembimbing Tetangguhan, & Susun tindeh adat)

TANGGUH NYESUI LUYUT
Keterangan:
Pada dasarni Tangguh Nyesui Luyut ji nyesui-i kici’an tian sanak atau muli-meranai sai radu jak ngejadikon kicik rencaka sai mupatut daleh aga bulamban (burumah tangga).
Serta radu jak buwarah jama uluntuha ni masing-masing. Kebiasaan ni, sai ratong uluntuhani meranai, kidang mawek nutup kemungkinan uluntuha ni muli sai nyesui, kira-kira kik meranai no aga nutuk muli (semanda).

*****Tahapan-tahapan dlm Tangguh ni*****
  • Nyawako ampai sampai, ampai lumpak rik ngilu mahap.
  • Nyawako lelugah ni tian sanak, ria kik meranai neram jak bewarah, jak ngejadiko kicik rencaka sai mupatut jama muli neram dija.
  • Aga ngilu ya.
  • Aga ulang laju kicik rencaka ni sanak rua ji, semaya lambani, akad nikah laju kepak pangkut sedekahni.
  • Nangguh lumpak rik ni ketu wat kici’an sai mupatut makung ti kicik ko pada bingi sinji jemoh sawai ni ti tatutul ko muneh.

****===========000==========****

Contoh Tangguh nyesui luyut (SECARA UMUM)

►
Assalamualaikum wr.wb.
Aga tetabik pai Adndo. Ajo sekindua dija aga ngebabah kon tangguh jama Adndo disan.
Semakung ni sekindua nyampaikon tangguh, memana ni pai sekindua dija  lamon-lamon mahap. Kintu bang kintu nihan delom tangguh sekindua dija, injuk kimbang mak busasusunan gayani, injuk kimbang sesuk sendalai gayani atau injuk kimbang mucapu, delom seno sa sekindua lamon-lamon kilu mahap.
►
Kemedani jak isan, jo dia injuk bagini sekam rua minggoman ji ampai sampai, ampai lumpak. Na lain muneh dana kik ngemak ko lumpak sai radu ji, ketu kelumpaan sekam rua pada bingi sinji, wat do nihan sai perlu aga ti sampai kon. Serta perlu muneh injuk ketirua minggoman no aga mandai ya, ria kik retiani dikala rua telu rani sai radu ji, injuk meranai neram jak lumpak, jak bewarah daleh bucerita. Na ria kik radu jak ngejadi ko kicik rencaka sai mupatut jama muli neram dija.
►
Delom isi kicik rencaka ni tian rua retiani, ya do da aga nanjok ko bekeluarga, laju kepak aga berumah tangga. Delom seno muneh retiani, injuk ani anak meranai neram, na radu menjadi kemupakatan ni tian rua, delom status adat istiadat retiani, tian rua no mak ngedok bebunyian, ketu bang dipa rang-rang ni tian senang gawoh... aga netok di lumpak pun juga dija ya….
Kemeda ni jak seno, masalah maskawin ni tian rua retiani, radu wat muneh kesepakatan ni tian rua, na ria kik injuk muli neram ngilu mas kawin retiani 7 suku mas. Uleh ketutuk sai bareh, na muli neram mawek ngilu, kidang kik wat api salahni.
jadi  seno do dindo, wujud maksud delom tangguh daleh cerita jama keti rua minggoman dija. Na Delom seno sa, sekindua aga lamon mahap, ajo aga ku kerap ko pesan ria. Na api juga sai menurut warah daleh ceritani anak meranai neram no retiani, ijuk bagini sekam rua minggoman, makung muneh da hak injuk netok nati, serta kihak radu nemon di wada. Na seno muneh da sai menjadi lapah sekam rua minggoman aga ngasot kon ya, serta aga ngulong kon ya, Laju kepak retiani nyesui i ya, temon kudo mak kudo, api sai warah daleh cerita ni meranai neram no.
Ketu bang temon, wat serta benor muli neram jak bu warah serta bu cerita jama keti rua minggoman, na Alhamdulillah  way nutuk buloran gaya ni. Na ketu bang mak ngedok kung retiani, na seno ampai angon-angon serta anggop hati laju kepak ampai hanipi ni meranai neram ria. Sekam rua minggoman ji lamon-lamon mahap, seno do indahni neram lagi bu rencaka, nyepok salindar ni sai helau.
Jadi Dindo… seno do pai, tangguh daleh punyerapa jak sekindua dija, delom sang bahiti ruani serta aga lamon-lamon kilu mahap.

JAWAB JAK ADNDO
Payu ana Abang Aji, adu nengis muneh tangguh daleh cerita ni Abang Aji disan. semakung ni sekindua dija nanggapi tangguh daleh cerita ni Abng Aji,   sekindua dija juga retiani aga lamon-lamon kilu mahap muneh. Na induh dana injuk timbul cucul kapul mak kena julai sapai ni, Na injuk kimbang sesuk sendalai gayani,  delom seno sa aga lamon lamon kilu mahap muneh.
Kemedani jak isan, ana do retiani, ketirua no ampai sampai, ampai lumpak. Injuk ani Abang Aji disan, na lain muneh ngemak ko lumpak sai radu ji,  kintu bang injuk ani Abng Aji karu, kelumpak bingi sinji  na wat do nihan pangkut ni, serta retiani wat muneh sai perlu di sekam rua minggoman aga mandai ya….
Delom seno retiani, api juga babah tangguh daleh warah laju kipak cerita sai retiani adu di sampai ko Abng Aji retiani, jak sangbahiti mit rua ngbahiti ni, sekam rua minggoman adu mandai ya.. radu maklum ya.. serta retiani adu nemon di wada. Riakik sai di warah daleh cerita ni meranai neram di lumpak no, na reno muneh retiani warah ni muli neram dija, injuk ani Abng Aji jeno retiani way nutuk buloran gaya ni.
Kemedani jak seno, api juga sai radu menjadi kicik rencaka ni tian rua sai mupatut sai menjadi kesepakatan ni tian rua, injuk bagini sekam rua minggoman retiani radu nyayomi ya daleh radu ngerestui ya,,, serta makngedok semit gimpil ni delom rencakaan neram. Na jadi reno dopai abang aji, timbal uloh ni tangguh jak sekindua dija ngehaguk Abang Aji disan.

JAWAB JAK ABNG AJI
Payu ana Adindo, Alhamdulillah retiani wat timbal jak Dindo disan sai mupatut. Lain bugawohan senang serta hanjak ni ati nengis timbal daleh tanggapan jak Adindo disan.
Jadi Adndo… aga wat muneh  bubuh lapok ni tangguh, ria kik alang kepalang neram maseh putatemu serta burencaka, no do api sai radu di bantongko sanak rua ji, neram sai mutuha radu perda ngerestui ya. delom seno retiani injuk bagi sekam rua minggoman retiani betul-betul do dia aga ngilu ya.., Aga kerestuan ya, aga keikhlasan ya. Na gelar ni aga ngecemecok kon rumah tangga. serta injuk bagini tian rua ji, aga sesser ni nyawa sekam rua minggoman. Laju kepak aga hapik gimbarni sanak ramik kamno di lumpak serta dipa pun juga, delom ngecemecok ko bulambanan, laju kepak retiani bah bumekonan. Delom seno retiani ngilu ralis rulus ni, ngilu ikhlas ni, mudah-mudahan retiani kik muralis jak awal ni, na muralis muneh tugok akhir ni. reno do Dindo, bubuh lapok ni tangguh sekindua.

JAWAB JAK ADNDO
Na payu ana Abng Aji, na ana wat muneh bubuh lapok ni tangguh ni Abng Aji jak isan, sekam rua minggoman retiani radu serapak nengis serta radu maklumi ya.
Delom seno sa, mak ciga dia retiani neram bukuta direraba. Nyesol mawek mendua, mak ngedok guna nyesol kik radu. Na riakkik retiani  injuk sanak sinjii  injuk ani sai mak dija sa..  mubalak kada badan, kidang segala ni  injuk makung muneh wat sai ti sengkurung. Ngehalu mawat muneh api lagi aga ngabantong nguyunko rumah tangga, laju kepak bumekonan na injuk makung do wat tisengkurung di sanak sinji.
Na mak ciga dia retiani injuk bagini Abng Aji rik Wo Aji, piker-piker pai juga semakung ni mukelanjor mak ngedok guna nyesol kik radu.

JAWAB JAK ABNG AJI
Payu ana Adndo, adu nengis muneh bubuh lapok ni tangguh jak Adndo disan, delom sangbahiti seno sa, injuk ani Adindo disan, Bukuta di reraba mak ngedok guna sesol kik radu, delom seno retiani bagi sekam rua mingoman laju kepak retiani disanak ramik kemeno dilumpak radu maklum ya.. reraba radu mena kalau mawek suya. Mejong muneh di angon-angon, Kalau tian rua bahagia,, sesuai muneh jama du’a neram pok, pelulung perda lana beguna jama keluarga laju kepak di marga. Daleh Adu nemon di wada, sinji do sai di cita-cita ko neram pok kunyinni. Jadi seno adindo timbal uloh ni tangguh Adindo disan.
►
Jadi Adindo….., injuk lagi wat do aga lapokan ni tangguh, riakik retiani bukuh ni kinjuk pering sirok ni kinjuk tali, ya do da aga ulang lajuni kicik an tian sanak,  riakik aga pangkut nikah serta pangkut sedekah ni sanak rua ji, delom itung-itunganni, serta rani betik rani kunyaianni, ketu bang adu wat ti sengkurung di keti rua minggoman seno do irak-irak ni hati, ketu bang injuk mangkung wat ti sengkurung, seno indah ni neram lagi bu rencaka. Mak ciga dia neram seundah di penghalu.

JAWAB JAK ADNDO
Payu ana Abng Aji, adu maklum do api sai disampaiko Abang Aji disan, adu benor do da, aga ulang lajuni kicik rencaka an tian sanak, riakik aga pangkut pernikahan ni tian rua serta aga pangkut sedekah ni sanak rua ji. Delom sangtumpuk seno retiani injuk makung do hak wat retiani ti sengkurung di sekam rua minggoman, itung-itung bilang pak ni. Rani betik rani kunyaian ni, aga tiserah pai retiani jama Abang Aji, aga nyepok ko retiani bingi rani ni sai muhelau retiani kena dirani betik, rani kunyaian, sekam rua minggoman nurut ria.
JAWAB JAK ABNG AJI
Payu ana Adindo, radu benor do api sai disampaiko Adindo Disan, pangkal ni pai retiani, aga bingi rani ni pangkut semaya lamban ni sanak rua ji, riakik pangkut nikah serta pangkut sedekah ni sanak rua ji, delom seno retiani menurut itung-itung ni sekindua dija radu muneh jak ti pengluleh ko jama sai pandai. Na rani betik rani kunyaian ni sanak rua ji, pangkut nikah ni retiani di tanggal 17 Romadon ji 1438H. butepatan muneh retiani di tanggal 17 Juni 2017. Pangkut neram sedekah retiani di tanggal 30 bulan Juli 2017. Bertepatan tgl 5 Syawal 1438H rani Sabtu.
Jadi reno do pai Adindo delom semaya lamba ni sanak rua ji. Kintu bang wat  sai aga tirubah ni delom rencakaan neram bingi sinji, serta wat sai injuk tekelincar, mak ciga dia ti tatutul ko di jemoh sawai ni sa, jadi reno do pai Adindo, lamon-lamon mahap kintu wat sai injuk mucapu gaya ni.
JAWAB JAK ADNDO
Payu ana Abng Aji, na api juga sai disampaiko Abng Aji na radu dia wat sirok kinjuk ni tali, ria kik retiani adu wat semaya lambanni. Pangkut nikah serta pangkut persedekahan ni sanak rua ji,  radu wat tetok tingon bingi rani ni sai muhelau, payu ana Abng Aji perda dia neram nunggu ya.
►
JAWAB JAK ABNG AJI
Jadi Adindo, radu do neram ja burencaka, na alhamdulillah retiani, api juga sai ti rencaka kon neram mak ngedok ginjal pitas ni temu di sai muhelau.
Mak tangkak ni ajo bingi kiser murelom, injuk sekam rua Wo Aji muji  aga lumpak, delom seno sa  neram semahapan.
JAWAB JAK ADNDO
Payu ana Abng Aji, api juga kicik rencaka neram bingi sinji  radu dia kimbang selessai alhamdulillah retiani adu wat tetok tingon bingi rani ni.
Na ana injuk ani Abng Aji disan bingi ji adu kiser merelom mak tangkak ni keti rua Wo Aji aga lumpak, na payu mak minok goh kudo..??.

==========0000==========

Catatan:
  • MATERI diatas hanya sebagai contoh sesuai dengan susun tindehni Tetangguhan, untuk isi dan cara menyampaikannya tergantung dengan kelitahan di masing-masing individu.

  •  Penulisan kata huruf “KH” menjadi “R” agar memudahkan pembaca dalam memahami ma’na. contoh:  “Khiakik Khetiani” menjadi “riakik retiani”.

  •  Kata “Retiani” dipakai sebagai penyambung kalimat, dan sebagai jeda bagi kita untuk mempersiapkan kata/kalimat yang akan di ucapkan selanjutnya.

0 komentar
Langganan: Postingan (Atom)